Aínda non recuperados da festa polo Día das Letras Galegas, este 18 de maio é outra data para celebrar, pois tal día coma hoxe, pero en 1916, fundábanse na Coruña as primeiras Irmandades da Fala da man de Antón Vilar Ponte.
Esta organización recolle e potencia as aspiracións galeguistas do Provincialismo e o Rexionalismo, supoñendo o inicio do nacionalismo. Encárgase da dignificación e promoción da nosa lingua, usando como voceiro a revista A Nosa Terra. Ao mesmo tempo, funda diversas editoriais e publicacións periódicas, potenciando o uso do galego en todos os ámbitos. Tamén publican Algunhas normas pra unificación do idioma galego e un dicionario castelán-galego. Xorden no seu seo colectivos e institucións coma o Grupo Nós ou o Seminario de Estudos Galegos, que continuarán a tarefa de reivindicar e difundir o idioma.
As Irmandades cesan a súa actividade en 1931, tras a creación do Partido Galeguista, pero é grazas ao seu importante labor polo que podemos desfrutar da nosa lingua e cultura como a coñecemos.
Pese ter pasado tanto tempo, aínda resta xente que participou nas actividades das Irmandades naquela época, e Sermos Galiza entrevista a unha desas nenas, Elvira Varela. Podedes consultar o seu testemuño aquí.
Ningún comentario:
Publicar un comentario