Un ano máis, este 17 de maio celebramos o Día das Letras Galegas, desta volta adicadas a Manuel María(1929-2004), poeta, narrador e dramaturgo que tivo unha grande relevancia no marco cultural e político do século XX.
Sendo este un autor tan querido entre os galegos e galegas, son moi numerosos os actos de homenaxe cara a súa figura, entre eles a lectura dos seus poemas que platarformas como Queremos Galego foron publicando nas súas redes sociais.
Tamén son moitos os artistas que se suman á iniciativa de poñer voz a poemas que xa foran musicados, dous dos máis coñecidos son "O carro" e "Galiza", que vos deixamos a continuación:
O carro
Non canta na Chá ninguén,
por éso, meu carro canta,
canta o seu eixo tan ben
que a señardade me espanta.
Non hai canto tan fermoso:
fino coma un asubío,
anque é, as vegadas, saudoso
faise no ar rechouchío.
O meu carro é cerna dura:
sábese carballo e freixo.
¡Qué fermosa a sua feitura!
¡Qué lixereza a do eixo!
As cousas vanse aledando
por onde meu carro pasa.
¡Carrétame herba pro gando!
¡Traime a colleita pra casa!
Galiza
Galicia docemente
está ollando o mar:
¡Ten vales e montanas
e terras para labrar!
Ten portos, mariñeiros,
cidades e labregos
¡cargados de traballo
cargados de trafegos!
Galiza é unha nai
velliña, soñadora:
¡na voz da gaita rise,
na voz da gaita chora!
Galiza é o que vemos:
a terra, o mar, o vento...
¡Pro hai outra Galiza
que vai no sentimento!
Galiza somos nós:
a xente e mais a fala
¡Si buscas a Galiza
en ti que atopala!
Deixámosvos aquí tamén a ligazón ós audios de todos os seus poemas musicados, recollidos na páxina da Casa-museo Manuel María, onde podedes consultar tamén moitas outras cousas sobre o autor e as súas obras:
Asemade, este día sérvenos para reivindicar o uso da nosa lingua con total normalidade e en todos os ámbitos. Para defender este dereito, milleiros de persoas ateigaron as rúas de Santiago de Compostela con pancartas e instrumentos musicais, participando nunha multitudinaria mobilización que saíu da Alameda e rematou na Praza da Quintana. Estivo moi presente o espírito de Manuel María tanto durante a marcha coma nos actos posteriores, incluso no lema da manifestación, propugnado por Queremos Galego, "O idioma é a vida". Tendes aquí o manifesto con ese mesmo nome:
Tamén atoparedes aquí a crónica da mobilización dada por Sermos Galiza:
Todos os días estamos arrodeados das nosas benqueridas letras galegas, pero hoxe é un día importante para reivindicar a súa presenza, para que poidamos desfrutar da nosa lingua libre de prexuízos e outras trabas que, lamentablemente, aínda non foron eliminados.
Coidade das nosas letras, galos e galiñas!
FELIZ DÍA DAS LETRAS GALEGAS!
